Gikondena sa anti‑war advocate nga si Ben Tiu Contreras ang planong pagpatukod og naval base sulod sa Phividec Industrial Authority sa Tagoloan, Misamis Oriental.
Sa iyang interbyu sa Bombo Radyo, giingon ni Contreras nga ang pagtukod sa maong base militar sama ra gihapon sa pagtugot sa Estados Unidos nga himoong “launching pad” ang Pilipinas sa pakig‑away niini batok sa China.
Mipadayag si Contreras nga klaro nga kini ang tumong sa tanang EDCA sites ug mga base militar nga gipatukod sa US, dili lang sa Pilipinas apan apil na sa ubang gagmay nga nasud sa kalibutan aron gamiton sa gubat.
Busa, dili siya uyon nga adunay laing pasilidad nga posibleng gamiton sa panahon sa kagubot ug madamay ang Pilipinas sa mga internasyonal nga panagbangi.
Dugang pa niya, supak man siya sa bisan unsang kagubot sa kalibutan, mas maayo pa nga direkta nalang makig‑sumpaki ang US sa China kaysa damayon pa ang Pilipinas.
