Mipadayag og kabalaka si City Councilor Roger Abaday sa nagkadaiyang kantidad sa medical waste nga ginaprodyus adlaw-adlaw sa Cagayan de Oro City.
Sa iyang espesyal nga report atol sa regular session sa City Council kagahapong adlawa, iyang gibutyag nga mokabat sa 14,000 ka kilo o 14 ka metriko tonelada nga medical waste ang mamugna matag adlaw sa syudad.
Matud niya, ang maong basura nagagikan sa upat ka pampublikong ospital, siyam ka pribadong ospital, 37 ka laboratoryo ug diagnostic clinics, ug unom ka hemodialysis facilities.
Gidugang ni Abaday nga hangtod karon wala pa magamit ang hazardous ug medical waste treatment facility sa Pagalungan Sanitary Landfill tungod sa wala pa masulbad nga problema sa power infrastructure.
Tungod niini, iyang gisugyot nga tun-an sa mga komitiba sa Environment ug Health ang maong isyu uban sa DOH, City Health Office, mga ospital ug ubang stakeholders aron makapangitag tukmang solusyon.
