Nagpahinumdom ang founder sa Mindanao Pride nga si Hamilcar Chanjueco Jr. nga ang matag indibidwal angay gayod trataron nga may igong dignidad, respeto, ug patas nga oportunidad karong panahona sa Pride Month.
Hinuon, gitin-aw niini nga ang maong selebrasyon dili mahitungod sa pagpangayo og espesyal nga mga katungod, kondili usa kini ka panawagan alang sa usa ka katilingban diin walay usa ang mahadlok nga mahimong tinuod sa ilang kaugalingon.
Labaw pa niini, tumong sa maong kalihokan nga mapalambo ang usa ka palibot nga luwas ug malipayon alang sa komunidad sa LGBTQIA+ sa tibuok Mindanao ug sa tibuok Pilipinas.
Gidasig usab ni Chanjueco ang tanan nga magpabilin nga matinud-anon sa ilang pagkatawo samtang nagpadayon sa pagpakabuhi.
Ang iyang mensahe nagsilbi nga lig-ong pahinumdom sa padayon nga pakigbisog alang sa hingpit nga pagdawat sa nagkadaiyang bahin sa katilingban.
