Miarangkada ang programang Bigay Bigas Para sa Masa sa mga lungsod sa Lugait, Manticao, Naawan, ug Initao diin nakabenepisyo ang kinatibuk-ang 20,759 ka mga indibidwal o household beneficiaries niadtong Hunyo 5, 2026.
Subay sa paningkamot ni Gobernador Juliette T. Uy, gipadayag niini ang iyang pasalig nga kanunay anaa ang kagamhanan alang sa katawhan ug ang paghangyo sa paghiusa aron mapalig-on ang mga serbisyo sa probinsya.
Uban kaniya, mipadayag usab og suporta sila si Provincial Board Member Princess Emano, DILG Misamis Oriental Provincial Director Engr. Marisia Naybe, ug DSWD 10 Protective Services Division Chief Sean Pamela Balais, nga nagpahinumdom sa mga benepisyaryo nga kanunay ang gobyerno nga kadangpan panahon sa kalisod.
Ang maong inisyatiba, nga gipondohan pinaagi sa Local Government Support Fund – Financial Assistance to Local Government Units, gitumong aron matabangan ang mga sakop sa vulnerable sectors sama sa mga senior citizen, PWDs, solo parents, mag-uuma, mangingisda, ug mga trabahante sa transportasyon.
Ilabi na karong panahona nga nasinati ang krisis, dako ang pasalamat sa mga nakadawat tungod sa gibati nilang pagtagad pinaagi niining rice assistance nga gilusad aron masulbad ang problema sa kakulangon sa pagkaon.
