Malampuson nga nasakmit sa mga awtoridad ang gibanabanang duha ka kilo sa gidudahang shabu nga mikantidad og P13.6 milyones atol sa buy-bust operation sa Purok Santan, Brgy. Cabantian, Magsaysay, Misamis Oriental niadtong Hunyo 7, 2026.
Atol sa maong operasyon, nadakpan ang duha ka giilang High-Value Individuals nga sila si alias Kulot, 37 anyos, ug alias Eli, 38 anyos.
Gidayeg ni PBGEN Christopher N. Abrahano, ang Regional Director sa PRO 10, ang dedikasyon ug propesyonalismo sa mga operatiba sa PNP-DEG SOU 10 ug PDEA-10 sa ilang malampusong pagpahigayon sa maong operasyon.
Nasayran gikan sa imbestigasyon nga dugay na nga target sa kapulisan ang maong mga suspek sukad pa niadtong 2024 ug ang ilegal nga droga giingong gikan pa sa Manila.
Sa pagkakaron, giandam na ang pagpasaka og kaso batok sa mga dinakpan tungod sa paglapas sa Comprehensive Dangerous Drugs Act of 2002 samtang anaa na sila sa kustodiya sa mga awtoridad.
