Gipamatud-an ni Julie Mae Maisog-Robles, usa ka Psychiatric Nurse, nga dako og ikatabang ang mga fire ug earthquake drill sa paggiya sa mga estudyante ug magtutudlo atol sa mga emerhensiya sama sa linog.
Subay sa iyang pahayag, ang pagpabiling kalmado sa mga magtutudlo usa ka yawe aron dili mabalaka pag-ayo ang mga bata ilabi na kon makadungog kini og mga makapahadlok nga tingog sama sa sirena.
Dugang pa niini, gipunting ni Robles nga ang pagpahigayon og mga seminar ug lecture sa mga tulonghaan makatabang usab sa mga biktima nga nakasinati og traumatic experience human sa katalagman.
Bisan pa man nga dili mandatory ang matag eskwelahan sa pag-conduct niini, gipamugos sa Psychiatric Nurse nga kinahanglan gayud kini nga hatagan og prayoridad alang sa kaluwasan sa tanan.
Pinasikad niini, padayon ang pagdasig sa mga awtoridad nga hugtan pa ang pagpangandam sa mga publiko ug pribadong tunghaan aron kanunay nga andam sa bisan unsang natural nga kalamidad.
