Nanawagan ang kagamhanan sa dakbayan sa Cagayan de Oro, alang sa hugot nga suporta ug panaghiusa sa mga katawhan ning pagsaulog sa Independence Day.
Matod ni Acting City Information Officer Jade A. Adeser, dako og ikatabang ang pagtinabangay sa tanan ilabi na nga nasayran ang mga hagit nga giatubang sa nasudnong gobyerno karong panahona.
Gipasabot usab sa opisyal nga ang pagkakanya-kanya og baruganan magdala lamang og kagubot nga walay maayong padulngan alang sa mga lumulupyo.
Dugang pa niya, bukas ang lokal nga kagamhanan sa mga konstruktibong pagsaway ug naningkamot sila nga mahimong han-ay ang pagpatuman sa mga proyekto sa siyudad.
Busa, gidasig niya ang tanan nga magpabilin nga nagkahiusa ilabi na nga nagsingabot usab ang kasaulogan sa Charter Day karong June 15.
