Samtang nagpadayon ang pagpangandam sa buhatan sa Department of Agriculture 10 sa umaabot nga El Niño, gisugyot ni DA-10 Regional Executive Director Jose Apollo Pacamalan ang usa ka quick response intervention sa nasudnong buhatan diin sentro niini ang paggamit sa mga kagamitan sa pag-pump og tubig ug pag-convert sa mga livestock waste aron mahimong abono sa yuta.
Hinuon, gipasalig sa maong opisyal nga base sa forecast sa PAGASA sa sunod nga unom ka bulan, usa ra ka bulan ang giingong makasinati og below-normal nga ulan.
Bisan pa man sa maong kahimtang, gipunting ni Dir. Jose Apollo Pacamalan nga nagpabilin ang prayoridad sa ahensya sa mga food production areas sa kabukiran sama sa Talakag, Lantapan, ug uban pang dapit nga adunay taas nga relative humidity.
Gawas niini, gipatin-aw sa opisyal nga ang paggamit sa mga livestock waste makatabang sa pag-ugmad sa yuta aron dili kini dali nga maapektohan sa kainit.
Sa katapusan, ang tanan nga kini nga estratehiya gipatuman sa DA-10 aron masiguro ang padayon nga produksyon sa pagkaon alang sa mga mag-uuma ug mga konsumidor bisan pa sa posibleng huwaw.
