Gitin-aw ni Fr. Der John Faborada, Social Communication Apostolate sa Archdiocese of Cagayan de Oro, nga ang mga kalamidad walay gipiling tawo nga mahimong biktima niini.
Subay niini, gipasabot niya nga ang kalibutan dili perpekto busa dili gayod malikayan ang pag-abot sa mga disgrasya ug sakuna.
Dugang pa sa maong pari, dili angay husgahan kon kinsa ang angayan nga maigo sa trahedya tungod kay ang tanan gihigugma sa Ginoo bisan pa sa ilang kahimtang.
Busa, giawhag niya ang katawhan nga dili lang kutob sa pag-ampo ang buhaton, kundili kinahanglan usab ang paghatag og konkretong tabang alang sa mga biktima.
Sa katapusan, gipunting niya nga pinaagi sa pagtabang sa isigkatawo, mas mabati sa mga biktima ang presensya sa Ginoo taliwala sa ilang nasinating pagsulay.
