Pormal na nga giablihan sa Partidong PDP Laban inubanan ni City Councilor Joyleen Girlie Balaba ang bag-ong headquarters sa ilang partido dinhi sa dakbayan nga nahimutang sa Tomasaco, 8th Street, Nazareth.
Gipasabot sa konsehal nga mahinungdanon ang pagtukod sa maong buhatan aron adunay permanenteng basehan ang ilang partido nga nahisubay sa ilang mga mithi.
Dugang pa niya, bukas ang maong lugar alang sa tanang katawhan nga manginahanglan og tabang o kadtong buot nga moduol kanila.
Gawas sa pagserbisyo sa politika, himoon usab kining drop-off point sa mga hinabang panahon sa kalamidad sama sa baha, ilabina nga sayon kini maadtoan sa mga tawo.
Gihatagan usab og gibug-aton sa partido nga pinaagi niining inisyatibo, mas mapaduol pa ang ilang pagserbisyo ngadto sa mga komunidad.
