Gikumpirma ni Hon. Joyleen Mercedes L. Balaba sa PDP-Laban Cagayan de Oro nga mamahimong gamiton ang ilang bag-ong headquarters sa Tomasaco 8th Street isip buhatan sa mga kalihokan alang sa umaabot nga presidential elections sa tuig 2028.
Gipadayag ni Balaba nga bukas kini alang sa tanang katawhan nga adunay susamang prinsipyo sa pagbatok sa kriminalidad, druga, ug korapsyon nga gisugdan sa miaging administrasyon.
Dugang pa sa opisyal, usa kini ka paagi sa pagpakita sa ilang lig-on nga suporta ngadto kang Bise Presidente Inday Sara Duterte tungod sa dakong koneksyon niini sa mga Kagay-anon.
Busa, gipahibalo sa partido nga ang maong buhatan usa ka dapit diin mahiusa ang tanan nga nagtinguha sa pagpadayon sa mga plataporma ug programa ni kanhi Presidente Rodrigo Duterte.
Gihatagan og gibug-aton ni Balaba nga ang maong lakang nagpakita lamang sa kahiusa sa ilang partido sa pag-andam alang sa politikanhong kaugmaon sa nasud.
