Gidakop sa mga awtoridad ang usa ka 62-anyos nga Chinese national nga giila nga si alias Ong human kini misuway pag-ikyas sa usa ka checkpoint sa Linamon, Lanao del Norte.
Human sa gilusad nga hot pursuit operation, na-intercept ang iyang gigamit nga sakyanan sa Balite Drive Extension, Barangay Suarez sa Iligan City.
Base sa taho gikan sa Police Regional Office 10, nakumpiska sulod sa maong sakyanan ang 21 ka sako sa gidudahang mineral ores nga motimbang og 840 ka kilo ug nagkantidad og 105,000 pesos.
Tungod sa pagkapakyas sa suspetsado nga mopakita og legal nga mga dokumento alang sa maong mga kargamento, giatubang na karon niini ang kasong kalapasan sa Philippine Mining Act of 1995.
Isip pagtubag sa maong insidente, gipasalig ni PBGEN Christopher N Abrahano, Regional Director sa Police Regional Office 10, nga hugot nilang ipatuman ang mga balaod sa kinaiyahan ug dili sila motugot sa bisan kinsang mosulay paglapas niini.
