Gipahibalo ni Ryan Blanco,Disaster Risk Reduction and Management (DRRM) officer sa DepEd CDO, nga naghimo na sila og mga lakang alang sa pagpangandam sa hulga sa El Niño.
Sa ilang pakig-alayon sa CDRRM Council ug uban pang departamento sa kagamhanan, gipasalig ni Blanco ang pagmugna og contingency plan aron matubag ang posibleng hulaw.
Dugang pa ni Blanco, gi-require nila ang matag eskwelahan nga mag-andam og kaugalingong contingency plan, sama sa pag-reserba og tubig sa mga drum, tungod kay lahi-lahi ang sitwasyon sa mga tulunghaan sa hinterland, downtown, ug uptown.
Bisan pa man sa kainit sa panahon, giingon ni Blanco nga padayon pa silang nag-estorya aron maseguro nga walay mahitabong cancellation sa face-to-face classes.
Busa, gi-awhag sa maong opisyal ang tanang school DRRM coordinator ug mga principal nga magtinabangay sa pagpatuman sa mga precautionary measures niining panahona.
