Gitumbok ni Dr. Ronald L. Adamat, Chairman sa Volunteer Individuals for Peace, nga tataw nga usa ka matang sa political persecution ang impeachment complaint batok kang Bise Presidente Sara Duterte.
Gani, nagtuo siya nga kon makalahutay ang bise presidente niini nga proseso, dako ang kahigayonan nga siya ang mahimong sunod nga presidente sa nasod sa tuig 2028.
Sa laing bahin, gikuwestiyon niini ang pagtagad sa 13 ka mga senador nga naglangkob sa mayoriya, ilabi na sa mga taho nga buot pauboson ngadto sa 15 o 14 ang ihap sa mga boto nga gikinahanglan alang sa conviction.
Gipahinumdom usab ni Dr. Adamat base sa probisyon sa Artikulo 11, Seksyon 3, sub-seksyon 6 sa Konstitusyon, nga dili mahimong masentensiyahan ang usa ka tawo kon walay concurrences sa 2/3 sa tanang mga sakop sa Senado.
Busa, gihatagan niya og gibug-aton nga kinahanglan gyud ang suporta sa 2/3 nga ihap sa mga senador aron magpadayon ang proseso subay sa balaod.
