Gipatuman karon sa Misamis Oriental General Comprehensive High School o MOGCHS ang estriktong pag-inspeksyon sa mga bag sa ilang dul-an 4,000 ka mga estudyante aron malikayan ang pagpasulod og mga kontrabando sa sulod sa campus.
Subay sa pamahayag ni Principal Melende Catid, ang maong inisyatibo nagsugod na sukad pa sa miaging tuig diin gisunod na nila ang pamaagi sa mga airport, seaport, ug malls sa pag-check sa mga gamit.
Dugang pa niini, gipangandaman gayod sa tulunghaan ang seguridad sa matag entrance niini pinaagi sa pag-abli sa mga bag sa mga bata aron daling ma-intercept ang mga lighter, vape, sigarilyo, ug mga kutsilyo sa dili pa sila makasulod sa eskwelahan.
Isip bahin sa ilang mga safety measures, nakig-alayon usab ang administrasyon sa kapulisan sa Cagayan de Oro diin kanunay silang dunay mga pulis nga naka-schedule ug naka-standby sa lugar.
Bisan pa man sa mga hagit, gipadayag ni Principal Catid nga maayo ang dagan sa ilang gipatuman nga mga lakang aron masiguro ang proteksyon sa tanang anaa sa sulod sa campus.
