Gimando na sa Department of Education Division of Cagayan de Oro ang pagpahugot sa seguridad sa tanang tunghaan human kini nag-isyu og Division Memorandum.
Agi og dugang nga lakang, namahayag si Ryan Blanco, gikan sa DRRM DepEd CDO nga hugot na nga ipatuman ang pagsusi sa mga bag sa tanang tawo nga mosulod ug mogawas sa mga entrance gate sa mga eskwelahan.
Hinuon, gipaniguro ni Blanco nga ang maong inspeksyon himuon sa pamaagi nga dili makapainit sa ulo sa mga ginikanan o mga bisita nga mosulod sa campus.
Tungod niini, nangayo siya og pagsabot sa tanan ilabi na kay ang maong istriktong polisiya gipatuman alang lamang sa seguridad ug safety sa mga bata human sa nahitabong insidente sa Tacloban City.
Ingon man usab, nakig-alayon na ang ahensya sa kapulisan aron mangayo og presensya niini sulod sa mga eskwelahan isip dugang panalipod sa mga tinun-an.
