Gipalig-on sa kagamhanang probinsyal ug sa Department of Environment and Natural Resources o DENR ang ilang panagtambayayong pinaagi sa courtesy visit ni DENR Regional Director Henry Adornado ngadto kang Governor Juliette T. Uy.
Atol sa maong panagtigum, gihisgutan ang mga plano aron mapalambo ang turismo ug mapreserbar ang kinaiyahan sa tibuok Misamis Oriental.
Sumala ni Adornado, andam ang ilang buhatan sa pagsuporta niining mga inisyatibo pinaagi sa pag-ila sa mga lugar nga adunay potensyal alang sa eco-tourism ug pagtabang sa mga aplikante bahin sa mga tenurial instrument.
Dugang pa, gipadayag usab niini nga nagpadayon ang ilang pag-alayon sa lokal nga panggamhanan aron masiguro ang pagpatuman sa mga programa sa reforestation ug pagpanalipod sa biodiversity.
Kini nga kolaborasyon nagsilbi usab nga higayon aron mas mapalapad pa ang mga programa sa lalawigan alang sa malungtarong kalambuan sa komunidad.
