Tungod sa nasinati nga tumang kainit sa panahon, gideklarar na sa mga awtoridad sa New York ang heat emergency aron paghatag og proteksyon sa mga residente.
Matod ni Bombo International Correspondent Bombo Dolly Ilogon, miabot na sa 94 degrees Fahrenheit ang temperatura sa dakbayan ug gilauman nga mosaka pa kini hangtod sa 110 degrees sa umaabot nga mga adlaw.
Aron malikayan ang dehydration ug uban pang risgo sa panglawas, giawhag sa mayor ang publiko nga magpabilin sa sulod sa balay nga adunay air conditioning ug moinom og daghang tubig.
Gawas sa New York, apektado sab sa maong grabeng heatwave ang dul-an sa usa ka ikatulo nga bahin sa Estados Unidos, lakip ang mga siyudad sa Washington D.C., Boston, ug Nashville.
