“Impeachment is a special protection” matud pa ni Atty. Oscar Moreno, kanhi mayor sa Cagayan de Oro ug magtutudlo sa balaod sa Xavier University.
Subay sa gipadayag ni Atty. Moreno sa Bombo Radyo, bisan pa og dili impeachable ang posisyon isip usa ka kalihim sa usa ka ahensya, ang paghupot sa posisyon isip Bise Presidente naghimo kang Vice President Sara Duterte nga sakop sa maong proseso sa pagpanubag.
Dugang pa niya, samtang ang usa ka ordinaryo nga kalihim sa Department of Education mahimong tangtangon sa presidente sa bisan unsang oras, ang impeachment nagpabilin nga bugtong pamaagi aron mapanubag ang usa ka opisyal nga anaa sa ilawom sa maong espesyal nga panalipod.
Tungod niini, gipasabot sa abogado nga ang maong proseso mao gayod ang gikinahanglan nga mekanismo aron mahuptan nga responsable ang bise Presidente kung mapamatud-an nga tinood ang mga alegasyon batok kaniya.
