Gikumpirma sa kanhi Gabriela Women’s Party Representative nga si Liza Maza nga daghang mahinungdanong isyu ang naresolba na sa unang tulo ka adlaw sa impeachment trial, lakip na ang pagpili kang Senator Chiz Escudero isip presiding officer.
Gipunting ni Maza nga bisan og adunay mga teknikal nga debate, importante ang pagpresentar sa kredibleng witness nga nag-authenticate sa video kalabot sa gipasangil nga death threat ni Vice Pres. Sara Duterte ngadto kang Presidente Marcos.
Dugang pa sa kanhi magbabalaod, nagpabiling kontrobersyal ang threshold nga 16 ka mga senador aron makonbikto ang bise presidente, diin mahimo pa kini nga kuwestiyonon sa Korte Suprema.
Apan, malaumon si Maza nga unta pakunhuran ang mga teknikalidad sa husay aron mas masabtan sa publiko ang mga ebidensya nga ipresentar batok kang Duterte.
