Hingpit na nga nakabalik sa ilang mga panimalay ang mga pamilyang apektado sa pagbaha sa Northern Mindanao human mihupa ang tubig baha nga dala sa Southwest Monsoon.
Matud pa ni Dir. Antonio Sugarol sa Office of Civil Defense Regional Office X, bisan og wala nay naitala nga mga evacuation center sa pagkakaron, mokabat sa 843 ka pamilya o 5,076 ka indibidwal ang naapektohan sa maong katalagman.
Sa dagan sa maong mga pagbaha ug pagdahili sa yuta nga natala sa Valencia, Malaybalay, ug Quezon, nakumpirma sa opisyal ang duha ka mga namatay tungod sa maong kalamidad.
Dugang pa ni Direktor Sugarol, nagpadayon ang ilang pagmonitor human usab makatala og 112 ka mga panimalay nga naguba, diin 110 niini ang partially damaged ug duha ang totally damaged.
