DILI DESERVING! Mao kini ang komento ni former Kabataan Partylist Representative Raoul Manuel sa presidential candidacy bid ni Vice Presidente Sara Duterte karong umaabot nga 2028 elections taliwala sa iyang giatubang nga impeachment trial.
Namahayag si Manuel sa Bombo Radyo nga ang kinaiya sa bise presidente nga manghulga ug puno sa kapintasan ang mga pahayag usa matod pa ka makahadlok nga kinaiya kung siya mahimong presidente sa nasod.
Dugang pa, gipunto niya nga dili angayan nga magpabilin sa katungdanan ang usa ka opisyal nga nagpakita sa maong matang sa paggawi ug dili angay nga padayonon sa pagserbisyo sa publiko.
Nagpasidaan usab ang kanhing representative sa mga katawhan, ilabi na sa mga supporter, nga sa umaabot nga piniliay, angayan nga dili na botaran o tugotan nga makalingkod pa ang mga lider nga adunay susamang makahadlok nga kinaiya.
