Gipahinumduman ni Mary Trissha D. Laureta-Granados, ang Nutritionist Dietitian II ug City Nutrition Program Coordinator sa City Health Office, ang publiko nga ang pag-amping sa panglawas dili lamang kutob sa bulan sa Hulyo.
Subay sa selebrasyon sa ika-52 nga Nutrition Month, hugot niyang gidasig ang mga pamilya nga mopili og mga pagkaon nga balanced ug likayan ang kanunay nga pagpakaon sa mga bata og karne, junk food, ug mga soft drinks.
Gawas sa saktong pagkaon, gihatagan usab og dakong pagtagad ni Granados ang kamahinungdanon sa pagmintinar sa limpyong palibot ug ang saktong paglabay sa basura aron mapahilayo ang pamilya sa mga sakit.
Alang kaniya, ang nutrisyon usa ka adlaw-adlaw nga obligasyon nga angay ipraktis sulod sa matag panimalay aron masiguro ang maayong kaugmaon sa matag miyembro.
