“Solusyon ang kinahanglan, dili ang pagpamudmud og ayuda sa katawhan!” Mao kini ang hugot nga panawagan sa pundok sa Kabataan Partylist subay sa mga lakang sa administrasyon nga kon adunay problema sa nasud, ayuda dayon ang direktang ipagawas niini.
Isip pagkondena, gipadayag ni Florence Guzon, ang Vice President for Visayas sa Kabataan Partylist, ang iyang mulo nga ang 2025 National Budget gihimo hinuon nga usa ka “ayuda budget” tungod kay puro ra kini temporaryo nga solusyon.
Gipasabot usab niya nga ang mga programa sama sa YAKAP, AICS, TUPAD, ug ang bag-ong UP-LIFT Assistance Program sa administrasyon kay daling maigo sa korapsyon ug gihimo lang nga “utang na loob” sa mga tawo ang kuwarta nga gikan ra usab sa ilang kaugalingong bulsa.
Samtang nagpadayon kini, giawhag niya ang gobyerno nga atubangon ang tinuod nga krisis sa ekonomiya pinaagi sa pagmugna og mga malungtarong pamaagi imbes nga magsigi og hatag og pinansyal nga tabang.
