Sama sa mga ordinaryong Pilipino, amindo si Hakbang ng Maisug Convenor Atty. Vic Rodriguez nga wala na siya maglaom og dako sa State of the Nation Address o SONA ni Pangulong Ferdinand Marcos Jr. niadtong Lunes.
Sa interbyu sa Bombo Radyo, gisaway sa maong convenor nga dili gani makapadagan og daghang mga tren ang nasud, unya karon nagsaad ang pangulo nga magpalupad og usa ka rocket padulong sa kawangan.
Wala matod pa makita sa pundok ang kamahinungdanon niini, busa duda sila kung ngano kini usa sa mga prayoridad sa pangulo.
Segun usab sa nakaangkon og daghang pagsaway nga SONA sa pangulo niadtong Lunes, nagtuo matod pa ang maong pundok nga nagpasabot lamang kini nga naa sa sayop nga direksyon ang administrasyon tungod kay wala niini mahatagi og maayong serbisyo ang mga Pilipino, ilabi na sa hisgutanang barato nga bugas, nga gipunting niya nga magpabilin nalang usa ka damgo sa mga katawhan samtang maghangad sa nilupad nga rocket sa pangulo.
