Gipalapdan pa sa kapulisan ang ilang monitoring sa mga karaang notorious drug den sa syudad human nakuhaan og 3.4 ka milyon ka pesos nga balor sa shabu ang Barangay 36 sa Dakbayan sa Cagayan de Oro niadtong Hulyo 27.
Sa usa ka interbyu, gibutyag ni Police Regional Office 10 Spokesperson PMAJ Joann Navarro nga ila pang pagasutaon kun drug cleared na ba gyud ang maong barangay nga gihimong bagsakahanan ug transaksyonan sa gidiling drugas.
Nahimong kontrobersyal ang maong operasyon sanglit ang nadakpan nga High Value Individual nga si alias Rio, nga 30 anyos ug taga-Barangay Patag, napreso na kaniadto sa Lumbia tungod sa sunod-sunod nga pagpanulis apan nakagawas pinaagi sa bail ug daling mibalhin sa pagpamaligya og illegal nga drugas.
Gumikan niini, giandam na sa kapulisan ang pormal nga kasong paglapas sa Republic Act 9165 batok sa nadakpang suspek ug sa gipangita pa nga kauban niini nga si alias Jojo.
