“Chill lang” ug wala na makigdumog sa protesta sa kaulohan ang pundok sa Partidong Demokratiko Pilipino (PDP) Laban atol sa State of the Nation Address (SONA) ni Presidente Ferdinand Marcos Jr. niadtong Lunes.
Sumala ni Coco Naik, ang Chairperson sa PDP Laban Migrant Workers Committee, gipasagdan na lamang nila ang Pangulo nga ibutyag na usab ang iyang mga gipangangkon nga bakak ug mga saad sa nasud samtang sila nagmonitor lamang.
Dugang pa ni Naik, wala gihapon matuki sa Pangulo ang ilang gustong madungog tungod kay milihay kini sa pagtuki sa isyu sa korapsyon.
Gipamugos sa maong pundok nga kinahanglan untang giatubang ang maong isyu ug gihatagan og panubag, apan pakyas gihapon ang Pangulo sa paghatag sa dugay nang gihulatang impormasyon kabahin sa estado sa imbestigasyon sa halapad nga flood control scandal sa nasud.
