Ipakita sa dakbayan sa Cagayan de Oro ang mga modernong solusyon sa ekonomiya ug agrikultura pinaagi sa pag-host sa 35th Mindanao Business Conference o MinBizCon gikan Agosto 11 hangtod 13 sa Limketkai Atrium.
Gipahayag ni Engr. Elpidio Paras, kanhi presidente sa Cagayan de Oro Chamber of Commerce, nga hatagan og pagtagad sa tulo ka adlaw nga komperensya ang mga importanteng hisgutanan sama sa investment forum, alternative mass transit, ug climate action.
Tungod sa pag-uswag sa teknolohiya, gitin-aw sa opisyal nga ipasundayag usab sa maong tigom ang paggamit sa smart agriculture pinaagi sa satellite technology ug containerized farming aron mapalambo ang pagpananom sa rehiyon.
Dugang pa ni Paras, tutokan usab sa panagtigom ang digital infrastructure ug ang pagpatuman sa Artificial Intelligence o AI pinaagi sa pagtukod og mga data center sa nagkadaiyang bahin sa nasud lakip na sa Mindanao.
