Pabor ang Partidong Manggagawa ug ang Nagkaisa Labor Coalition sa mga panawagan nga wagtangon na ang Regional Tripartite Wages and Productivity Board o RTWPB sa nasud.
Sumala ni Partidong Manggagawa Chairperson Ka Rene Magtubo, wala na’y pulos kini nga sistema sa pagtakda sa suholan nga nagbarog sa milabay nga sobra 30 ka tuig tungod kay wala gihapon kini nakapataas sa suholan sa mga rehiyon.
Dugang pa niya, nagpabilin gihapon sa ubos sa poverty threshold ang suholan sa mga trabahante sa nagkadaiyang dapit gawas sa National Capital Region o NCR.
Tungod niini, gisugyot sa opisyal nga bag-ohon na ang kasamtangang sistema aron mapatuman ang usa ka uniform national minimum wage alang sa tibuok Pilipinas nga nakabase sa matuod nga cost of living.
