Gipailawom sa National Grid Corporation of the Philippines kon NGCP sa yellow alert ang tibuok suplay sa kuryente sa Mindanao tungod sa hilabihang pagnipis sa reserba sa enerhiya.
Sumala ni NGCP Mindanao Spokesperson Mae Roselle Curiano, miabot lang sa 2,672 megawatts ang available capacity sa rehiyon samtang ang peak demand nagpabilin sa 2,527 megawatts.
Dugang pa sa opisyal, nahitabo kini nga pagnipis kay adunay 12 ka mga planta ang nakasinati og forced outage diin apil sa nakatala og aberya mao ang pagkalangan sa pagbalik sa Sarangani Energy Corporation Unit 2 ug ang emergency shutdown sa GNPower Unit 1 tungod sa boiler tube leak.
Gumikan niini, nagpabilin ang pahimatngon nga posibleng mas mosaka pa ang demand kon ugaling aduna pa’y dugang mga generating units nga ma-outage sa sistema.-
