Gipahimangnoan karon sa City Health Office ang publiko nga mag-amping sa hulga sa heatstroke tungod sa padayon nga pagsaka sa kainit sa panahon.
Gipahayag ni City Health Officer Doctor Rachel Daba-Dilla nga peligroso kaayo ang maong kahimtang ilabi na sa mga edaran ug bata, diin bisan wala pay natala nga namatay sa dakbayan sa Cagayan de Oro, adunay na’y pipila nga nakasinati og pag-ubos sa sodium ug potassium sa lawas.
Gawas pa niini, gitin-aw sa doktora nga kon makasinati og pagsakit sa ulo, pagkalipong, ug pagpaundang sa singot, kinahanglan nga dad-on dayon ang pasyente sa pinakaduol nga ospital aron matagaan og paspas nga pag-atiman.
Dugang pa gani niini, nagpahinumdom usab si Dr. Dilla nga dili dayun ipainom og tubig ang tawo nga nawad-an ug “consciousness” aron malikayan ang dugang nga komplikasyon sa iyang baga.
