Padayon gihapon ang pagpangandam alang sa Barangay ug Sangguniang Kabataan Elections karong Nobyembre 2 taliwala sa mga hungihong sa pag-usab sa eskedyul sa maong piniliay.
Gitin-aw ni Misamis Oriental Provincial Election Supervisor Attorney Carlito Ravelo nga ang bugtong ginasunod sa Comelec mao ang nag-unang balaod nga nagmando sa pagpahigayon sa maong election, diin kinahanglan nilang ipatuman ang kasamtangang lagda aron dili sila maigo sa silot sa dili pagtuman sa balaod.
Subay niini, gipasabot usab sa opisyal nga ang gahum sa pag-usab o pag-amendar sa maong balaod anaa sa mga kongresista ug senador kon ugaling adunay sugyot nga pag-oktabar niini.
Busa, nagpabilin ang komisyon sa ilang katungdanan sa pag-alagad taliwala sa pagpaabot nga madayon ang pagpili sa bag-ong mga opisyal sa matag barangay ug kabatan-onan.
