Mukabat sa gibana-bana nga 500,000 pesos ang kadaot sa nahitabong sunog nga niguba sa napulo ka balay sa Zone 9, Caffa, Macanhan, Barangay Carmen kagahapong adlawa.
Sumala ni Carmen Fire Station Investigator FO3 Kevin Carl Vallejos, daling miresponde ang ilang tropa human nakakita og dakong aso samtang nagpadulong sila sa Convention Center.Sa inisyal nga imbestigasyon, nagsugod ang kalayo sa balay ni Arnulfo Cabalde, diin walo ka balay ang totally damaged samtang duha ang partially damaged.
Bisan pa man sa kalisod sa pagsulod sa lugar tungod sa nakasagabal nga mga wire, nakatabang usab ang mga residente pinaagi sa pagpasa-pasa og tubig aron mapugngan ang pagdako sa kalayo.
Hinoon, misaka pa sa ikatulo nga alarm ang maong insidente nga niresulta sa pagkaangol sa tulo ka sibilyan, samtang nagpadayon pa gihapon ang imbestigasyon sa mga awtoridad sa matuod nga hinungdan sa sunog.
