Nagsugod na sa ilang mga lakang ang kagamhanan sa dakbayan sa Cagayan de Oro aron mabantayan ang epekto sa hulaw diha sa natad sa agrikultura.
Sumala pa ni City Agriculturist Engr. Bernie Daba, Disyembre pa sa nakalabay nga tuig gipangandaman ang maong hulga pinaagi sa pag-andam sa mga gikinahanglang irrigation inputs para sa mga mag-uuma ug mangingisda.
Dugang pa sa maong opisyal, aprobahan na usab ni Mayor Klarex Uy ang budget ug ang gipagawas nga purchase request aron mapalit ang maong mga kagamitan.
Tungod niini, gamiton ang maong kagamitan aron mapuslan ug mapanindot pa ang mga yuta nga pwedeng tamnan bisan pa man sa pagsulod sa grabeng kainit.
Hinuon, gipasalig sa dakbayan nga padayon silang magpahigayon og mga tigum aron masiguro nga dili kaayo maigo ang panginabuhian sa katawhan.
