Aron mapakunhod ang pagdagsa sa mga tawo nga mi-avail sa libreng sakay sa Mary Rose Carnival kagahapong adlawa, nagpatuman og bag-ong sistema ang dakbayan alang sa katapusang hugna sa free rides ni Mayor Klarex Uy karong Higalaay Festival.
Gisaysay ni Acting City Information Officer Jade Adeser nga gibalhin nila kagahapon ngadto sa mga barangay hall ang pag-apod-apod sa duha ka libo ug lima ka gatos ka libreng tiket.
Gihatag kining maong kapilian sa mga opisyal sa barangay aron ipagawas ang mga tiket pinaagi sa first-come, first-served nga paagi alang lamang sa mga residente sa Cagayan de Oro.
Gibutangan usab og limitadong oras ang matag lugar sama sa Barangay Carmen nga gipagahinan gikan sa alas-6 hangtod alas-8 sa gabii aron magpabiling hapsay ang paglingaw sa komunidad.
Nasayran nga sa unang hugna sa maong kalingawan, liboan ka tawo ang midagsa sa entrance sa carnival nga gika-alarma sa City Hall.
