Gihingusgan sa Police Regional Office 10, pinaagi sa Regional Civil Security Unit 10, ang pagmando sa mga private security agency nga pahingusgan ang paggamit og metal detector sa pag-inspeksyon sa mga bag sa mga estudyante aron masiguro nga walay makasulod nga armas o hinagiban sa mga eskwelahan.
Sumala sa spokesperson sa PRO-10 nga si Police Major Joann Navarro, nagpagawas na sila og direktiba ngadto sa mga field commander aron palig-unon ang police visibility ug ang pakig-alayon sa mga barangay ug opisyal sa tunghaan.
Gipasabot sa opisyal nga base sa ilang pag-subay sa mga nahitabong pagpamusil sa Tacloban ug Zamboanga, nadiskobrehan nga rehistradong armas ang gigamit sa mga estudyante diin nagpakita kini og kapabayaan sa mga tag-iya.
Tungod niini, nagpahigayon na og mga information dissemination ug symposium ang kapulisan aron matabangan ang mga tunghaan ug maprotektahan ang kaayohan sa tanang estudyante sa tibuok rehiyon.
