Gimandoan na sa DepEd Cagayan de Oro ang mga tunghaan sa pagpahugot sa ilang seguridad human sa gipahigayon nga Management Committee meeting tali sa mga opisyal, kapulisan, ug mga opisyal sa barangay.
Sumala kay DepEd Cagayan de Oro Program Head Romeo Aclo, gihatagan nila og bug-at nga pagtagad ang kooperasyon sa matag panimalay aron masiguro nga dili makadala og bisan unsang klase sa hinagiban ang mga estudyante sulod sa mga tunghaan.
Dugang pa sa opisyal, gawas sa pagpatuman sa mga lagda sa seguridad, importante usab nga hatagan og bili ang mental health ug paminawon ang mga problema sa mga kabataan aron malikayan ang kagubot sa mga eskwelahan.
Gidugang usab ni Aclo nga kinahanglang palig-unon pag-usab ang pag-atiman sa pamilya ug ang pagpalig-on sa pagtuo sa Dios aron magsilbing giya sa mga kabataan sa ilang adlaw-adlaw nga kinabuhi
