Gihupay ni City Fire District Operation Chief F/SINSP John Rey-An Donasco ang kasuko sa mga residente kalabot sa giingong hinay nga pagresponde sa Bureau of Fire Protection sa nahitabong sunog sa Ebarle Street, Barangay 30 ning siyudad nga miabot sa ikaupat nga alarma.
Matod pa niya, dili tinuod nga nalangan ang ilang pag-abot tungod kay nahimutang lang ang ilang fire truck sa bakanteng dapit sa maong lugar aron malikayan ang baga nga aso ug mapugngan ang pagdagsang sa mga tawo.
Samtang gibutyag usab niya nga mikabat sa usa ka milyon ug tunga ka pisos ang inisyal nga danyos nga nakaapekto sa 98 ka mga indibidwal ug 28 ka mga panimalay.
Busa gipasabot ni Donasco nga ang nahisgutang trak nga nakit-ang mibiya kadiyot kay nahutdan lang sa tubig ug mibalik ra usab dayon human mag-refill aron ipadayon ang operasyon, samtang padayon pa usab nga giimbestigahan ang tinuod nga hinungdan sa maong sunog.
