Gikumpirma sa buhatan sa Police Regional Office 10 ang pagkaneutralize sa notadong lider sa Masaronay Group nga si Khalid Masaronay atol sa armadong engkuwentro sa Salvador, Lanao del Norte sa miaging semana.
Sa interbyu sa Bombo Radyo, giingon ni PRO-10 spokesperson Police Major Joan Navarro nga gihimo ang operasyon aron alagaran ang warrant of arrest batok sa akusado nga nasang-at sa siyam ka seryosong kaso sa pagpatay ug frustrated murder.
Apan nanukol ug mibawos og pamusil ang suspek, hinungdan nga napugos ang mga operatiba sa pagdepensa ug pagtumba kaniya.
Hisayrang nakuha sa crime scene ang usa ka M16 rifle, .45 caliber pistol, ug kapin o kulang 150 gramos nga gidudahang shabu nga gibana-bana og kantidad nga ₱1,002,000.
