Gipasalig sa Office for Senior Citizens Affairs (OSCA) nga gihikay na ang mas sayo nga pagpagawas sa social pension sa mga senior citizen sa dakbayan aron magamit nila sa nagkaduol nga kasaulogan sa Kalag-kalag.
Sumala ni OSCA President Victor Lagang, gipaningkamutan sa Department of Social Welfare and Development (DSWD) nga madawat sa mga benepisyaryo ang ₱3,000 nga ayuda sa katapusan sa Oktubre imbes sa Disyembre, aron dili na magkalisod ang mga senior citizens.
Ang maong kantidad naglangkob sa binuwan nga ₱1,000 alang sa mga bulan sa Oktubre, Nobyembre, ug Disyembre.
Dugang pa, ni Lagang nga ang DSWD maoy nag-implementa sa programa subay sa Republic Act 9994, ug ang ilang buhatan nag-coordinate aron mas hapsay ang pag-apod-apod sa pinansyal nga tabang.
