Gihan-ay na sa Archdiocese sa Cagayan de Oro ang mga importanteng kalihokan alang sa adlaw sa kapistahan karong Agosto 28.
Gipahayag ni Fr. Der John Faborada, Social Communication Officer sa Archdiocese sa Cagayan de Oro, nga pagahimoon gihapon ang Fluvial Parade ug Solemn Foot Procession nga magsugod pagkahuman sa alas kwatro kinse nga misa sa buntag ug molungtad ug kapin sa usa ka oras sa dili pa ang misas alas sais kwarentay singko.
Gawas sa pagpahigayon sa foot procession nga moagi sa mga dalan sa Corrales ug Capistrano, motapos ang fluvial parade diha sa dapit sa Duaw Park subay sa gihan-ay nga bag-ong ruta.
Tungod sa maong dako nga kasaulogan sa syudad, magpatuman usab ang kagamhanang lokal ug RTA sa temporaryong pagsira sa pipila ka kalsada aron masiguro ang hapsay ug luwas nga dagan sa trapiko.
