Wala pa man natapos ang kapistahan apan malipayon ang lokal nga gobyerno sa Cagayan de Oro tungod sa malampuson ang mga milabay nga mga dagkong kalihokan sa Higalaay Festival, matud pa ni Acting City Information Officer Jade A. Adeser.
Bisan pa man niini, gipadayag sa opisyal nga ang bugtong nareklamo sa katawhan mao lamang ang ulahi nga pahibalo sa signal interruption nga nagagikan sa paghulat sa pag-aprobar sa NTC sa adlaw mismo.
Gipahibalo usab nga magpahigayon ang working committee ubos sa City Tourism Office og post-assessment duha ka semana gikan karon aron masusi ang kinatibuk-ang dagan sa selebrasyon.
Hisayrang pinaagi sa maong lakang, matipon ang mga opisyal nga datos bahin sa ihap sa mga bisita, ang nisaka nga kita sa mga hotel ug restaurants, ug ang sitwasyon sa kalinaw sa dakbayan.-
