Dili pa mabanabana ang eksaktong ihap sa mga pamilyang naapektuhan sa dakong sunog nga miigo sa Zone 10 Upper Carmen ning siyudad karong sayo sa buntag, apan sumala sa initial nga impormasyon nga nakuha sa Bombo Radyo news team, dul-an sa 40 ka panimalay, 30 ka pamilya, ug 140 ka mga indibidwal ang gitahong nasunogan sa maong insidente.
Gipadayag usab ni Barangay Kagawad Angelo Sabanal nga sa West City Central School covered court una nga ipahimutang ang mga biktima aron mas mahimong hamugaway ang ilang pagpuyo tungod sa mga gamit nga pwedeng magamit didto.
Mando usab ni Kapitan Kikang Uy sa mga barangay health workers ang paspas nga pag-andam sa pagkaon alang sa mga pamilyang nasunogan.
Duyog niini, padayon karong nag-profile ang mga opisyal sa barangay samtang gihulat pa ang opisyal nga report gikan sa BFP.
