Mukabat sa P1.3 million ang gibana-banang danyos sa nahitabong sunog kagahapon sa sayo sa buntag sa Zone 9, Macanhan, Barangay Carmen.
Sumala sa pahayag ni Carmen Fire Station Commander SFO2 Bonie A. Antesco, dali nga miresponde ang pito ka BFP fire trucks kauban ang pito ka volunteer trucks aron palungon ang dako nga kalayo nga miulbo sa panimalay sa vlogger nga si Pril John Ladra Acao.
Dugang pa sa maong opisyal, dul-an sa 20 ka mga balay ang naugdaw sa maong sunog. Nasayran nga padayon pa nilang giimbestigahan ang tinubdan sa maong trahedya, apan nakita sa mga imbestigador nga posibleng hinungdan ang gubaon nga linya sa kuryente sanglit nag-brownout usab sa maong dapit.
Hinoon, luyo sa dakong danyos ug kakulba nga gidala sa maong sunog, gidugang sa BFP nga walay naangol ug kinabuhi nga nakalas.
