Masubo nga gipadayag sa magtiayon nga tag-iya sa Dandeals Garage nga wala gayud silay maski unsa nga kabtangan nga nasalbar human maugdaw ang ilang duha ka andana nga balay sa Zone 9, Carmen kagahapon sa sayo sa buntag.
Nasayran nga nag-atubang sa dakong peligro ang pamilya sa vlogger ug motorcycle dealer nga si Pril John Ladra Acao samtang migawas sila gikan sa maong balay taliwala sa padayon nga pagkahugno sa mga debris.
Sa pikas nga bahin, nakahatag usab og dakong kakulba sa mga residente ang sunod-sunod nga pagbuto sa mga motor, aircon, refrigerator, ug solar battery sulod sa maong panimalay.
Tungod sa maong insidente, gidudahan nga ang gubaon nga wiring o meter sa kuryente nga dugay nang nag-spark ang nahimong hinungdan sa sunog, hinungdan nga giduso karon ang daling pag-inspeksyon sa mga linya sa kuryente sa buhatan sa kuryente aron malikayan ang susamang trahedya.
