Giisa karon sa Department of Education o DepEd Region 10 ang pahimatngon sa seguridad sa mga tunghaan taliwala sa mga pagsulay sa pipila ka estudyante nga makapamuslit og mga hinagiban sama sa kutsilyo nga giingong gipatuyangan og tago sa mga tumbler, sapatos, ug ilawom sa pants.
Gipahayag ni DepEd Region 10 Chief Education Supervisor Dr. Ricardo Dragon nga kabahin sa ilang gisalmutang diskusyon ang sugyot nga paggamit og transparent bags ug ang pagbutang og metal detector sa matag pultahan sa eskwelahan pinaagi sa ilang Maintenance and Other Operating Expenses o MOOE.
Apan gidugang sa opisyal nga dili tanan makapalit dayon sa maong mga gamit, busa gihangyo ang pagtinabangay sa mga ginikanan ug PTA aron mapalig-on ang manual nga pag-inspeksyon sa mga gamit sa main entrance ug sa sulod mismo sa klasehanan.
Tungod sa maong hulga sa seguridad sa mga kabataan, gipahinumdoman ang tanan nga matag usa sa katilingban adunay obligasyon nga magmatngon ug magtinabangay aron malikayan ang bisan unsang disgrasya.
