Gipadayag sa National Anti-Poverty Commission o NAPC ang dinalian nga pagbag-o sa sistema aron mapanalipdan ang kabataan batok sa nagasaka nga insidente sa pagpamusil ug kagubot sa nasud.
Gipasabot ni NAPC Council Member Khyle Sabellano nga dili lang ang mga bata ang may tulubagon sa gihimong kasal-anan kun dili lakip na ang mga ahensya sa gobyerno ug ang tibuok katilingban nga nagatugot sa kultura sa bayolensya.
Dugang pa sa maong opisyal nga dako usab ang papel sa mga ginikanan sa pagdisiplina apan kinahanglang bag-ohon ang pamaagi tungod kay kasagaran sa gipakitang ehemplo sa mga hamtong mao ang gigikanan sa kasamok sa mga batan-on.
Mao nga nanawagan ang ahensya nga ang gihimong mga lakang sa Department of Social Welfare and Development o DSWD kinahanglan gayud nga maabot ug mabati sa mga nagpuyo sa hilit nga mga dapit aron matudloan ang tanan sa saktong pagpadako sa kabataan.
