Aron magpabilin nga luwas ug himsog ang tanan gikan sa epekto sa haze, nagpahimangno karon ang lokal nga kagamhanan sa Cagayan de Oro nga mag-amping ang publiko sa ilang paggawas sa panimalay.
Gidasig ni Acting City Information Officer Jade Adesser ang mga lungsuranon nga magsul-ob og N95 face mask ug limitahan ang mga kalihokan sa gawas aron makalikay sa posibleng peligro sa panglawas.
Gitin-aw sa opisyal nga ang kasamtangang kalidad sa hangin sa syudad nagkinahanglan og dugang pag-alisto, labi na alang sa mga lungsuranon nga adunay sensitibong kahimtang.
Tungod niini, giawhag ang mga bata, senior citizens, mabdos, ug kadtong adunay sakit sa kasingkasing ug baga nga magpabilin lang una sa sulod sa balay aron magpabilin nga protektado.-
