Napadali ug mas gipaspasan karon sa Bureau of Fire Protection o BFP ang paghuman sa imbestigasyon sa dako nga sunog sa Barangay Lapasan.
Kini matod pa human nga mismong ang suspek ang nisurender ug niangkon nga maoy nagdaob sa halos usa ka gatos ka panimalay sa Santa Cruz 2.
Sumala ni Fire Senior Superintendent Reynante Lorono, ang District Fire Marshal sa Cagayan de Oro, nakatabang pag-ayo ang pag-angkon sa suspek aron gilayon nga mahikay ang mga dokumento alang sa pagpasaka og kasong arson o tuyo nga pagsunog.
Gipasabot sa opisyal nga gawas sa pag-angkon, gipalig-on pa gyud ang imbestigasyon pinaagi sa posibleng gigamit nga accelerant sa suspetsado ug sa pahayag sa kanhing kapares sa suspek.
Bisan pa man sa maong paspas nga pag-angkon, gitinaw sa BFP nga pabilin gihapon nga inosente ang suspek subay sa balaod samtang wala pa kini opisyal nga sentensya gikan sa korte.
