Nagpasidaan ang tigpamaba sa prosecution panel nga si Representative Zia Alonto Adiong nga kinahanglang tumanon ug sundon ni Davao City Mayor Sebastian Baste Duterte ang subpoena gikan sa impeachment court.
Subay niini, gipadayag usab sa lead prosecutor nga si Representative Gerville Luistro nga pwedeng atubangon ni Mayor Baste Duterte ang kasong contempt o kaha hulatan ang laing patawag kon magdumili ang mayor sa pagtambong sa pagdungog sa kaso.
Gawas sa alkalde sa Davao, gipatawag usab sa korte si kanhi Senador Antonio Trillanes IV alang sa gilaomang pagtambong sa ika 13 nga semana sa pagdungog batok sa alegasyon sa unexplained wealth.
Bisan pa man niini, gipasalig sa prosecution panel nga padayon gihapon ang ilang pag-andam sa kaso aron ipakita sa tibuok nasod ang tinuod nga hulagway sa mga akusasyon.-
